. . .

Sú aukna áhersla sem Evrópusambandið leggur á samskipti við ríki um allan heim sést meðal annars á aðgerðum framkvæmdastjórnar ESB og ráðherraráðsins. Fyrir 15 árum önnuðust tvær stjórnardeildir framkvæmdastjórnarinnar utanríkismál, nú eru þær sex talsins. Til að koma í veg fyrir tvíverknað og tryggja að allar aðgerðir miði í sömu átt ber einn einstaklingur í framkvæmdastjórninni, Benita Ferrero-Waldner, ábyrgð á aðgerðum framkvæmdastjórnarinnar í utanríkismálum. Hún starfar náið með kollegum sínum sem bera ábyrgð á einstökum sviðum utanríkissamskipta - Louis Michel (þróunar- og neyðaraðstoð), Olli Rehn (stækkun ESB) og Peter Mandelson (utanríkisviðskipti).

Ferrero-Waldner á einnig náið samstarf við Javier Solana, æðsta yfirmanni starfsliðs ráðherraráðsins og talsmanns sameiginlegrar utanríkis- og öryggismálastefnu ESB (High Representative for the Common Foreign and Security Policy). Evrópusambandið hefur umfangsmikið samskiptanet um allan heim til að framkvæma utanríkismálastefnuna.

Í drögum að nýjum sáttmála ESB, sem áætlað er að gangi í gildi á árinu 2009, er gert ráð fyrir einum sameiginlegum talsmanni í utanríkis- og öryggismálum, þar sem störf framkvæmdastjóra utanríkismála og talsmanns ráðherraráðs ESB í utanríkis- og öryggismálum renni saman í eitt. Ásýnd ESB yrði þá skýrari og sýnilegri á alþjóðavettvangi.

Mikill fjöldi sendiráða erlendra ríkja er í Brussel til að annast samskipti við Evrópusambandið og framkvæmdastjórnin hefur um 130 fastanefndir um allan heim. Hlutverk þeirra er að rækta samskipti við viðkomandi ríki, kynna störf og stefnur ESB, framkvæma aðgerðaráætlanir t.d. í þróunarmálum og veita Brussel upplýsingar um atburði og aðstæður á svæðinu.

Auk tíðra funda milli ráðamanna, þingmanna og embættismanna heldur ESB reglulega ráðstefnur, einu sinni til tvisvar á ári með helstu samstarfsríkjum svo sem Bandaríkjunum, Rússlandi, Kanada og Japan. Í upphafi voru umræðurnar fyrst og fremst um viðskipti en fjalla nú einnig um ýmis pólitísk málefni eins og umhverfisvernd, alþjóðlega glæpastarfsemi, mannréttindi og baráttu gegn eiturlyfjasmygli. ESB er einnig samstíga í alþjóðlegum stofnunum eins Sameinuðu þjóðunum, Alþjóðabankanum og Efnahags- og viðskiptastofnun Evrópu (OECD). Samskipti við EFTA/EES ríkin eru náin og eiga sér stað í gegnum stofnanir EES-samningsins.