 Byggingarvísitala
á evrusvæðinu: Tölur frá Eurostat gefa til kynna samdrátt
(20/8)
Örlítill samdráttur (0,6%)
mælist á evrusvæðinu þegar byggingarvísitala sumarsins er
borin saman við tölur frá því í fyrra, samkvæmt nýjum tölum
frá Eurostat. Samdrátturinn mælist enn meiri þegar öll
aðildarríki ESB eru með í mælingunum eða sem nemur 1,5%. Það
er hins vegar er áberandi hversu misjafnt ástandið er þegar öll aðildarríkin eru borin saman. Sumstaðar
gætir mikillar grósku á meðan samdráttur virðist vera mikill
hjá öðrum. Til að mynda kemur fram í nýjum
tölum frá Eurostat að byggingavísitala Póllands hefur hækkað
um fimmtung frá því í fyrra á meðan tölur gefa til kynna
samdrátt í nýbyggingum um tæp 16% á Spáni.
Lesið nánar hér.
 Viðskiptahalli
meiri en reiknað var með
(18/8)
Samkvæmt upplýsingum frá
Eurostat er viðskiptahallinn í þeim fimmtán ríkjum sem mynda
evrusvæðið mun meiri í ár en gert var ráð fyrir.
Þess má þó geta að árið í
fyrra var að þessu leyti sérlega gott. Hátt verð á eldsneyti er meðal
þess sem aukið hefur mjög á viðskiptahallann.
Lesið nánar hér.
 Iðnaður:
Framleiðsla á evrusvæðinu svipuð og í fyrra
(13/8)
Eurostat birti á dögunum samanburðartölur
í iðnaðarframleiðslu
á evrusvæðinu á eins árs tímabili
eða frá maí í fyrra til júní
2008. Þegar framleiðslan á þessu tímabili er borin saman
kemur í ljós að verið er að framleiða svipað magn í ár og
gert var í fyrra. Hins vegar mældist aukning um 0.1% ef
framleiðsla innan allra ríkja ESB er skoðuð.
Lesið nánar hér.
 Ályktun
ráðherraráðsins um átökin í Georgíu
(13/8)
Ráðherraráðið hefur lagt fram
ályktun í fjórum liðum um átökin í Georgíu
og afleiðingar þeirra, ásamt tillögum um hvaða skref þurfi að taka til að
bæta ástandið á þessu svæði.
Meðal þess sem fram kemur í ályktuninni er að ESB hyggst
sjálft axla stærra hlutverk í Georgíu en það hefur gert til
þessa. Evrópusambandið íhugar til að mynda að senda friðargæsluliða
á þau svæði sem mestur órói ríkir.
Lesið nánar hér.
 Dauðarefsing
fordæmd
(11/8)
Þrátt fyrir ítrekaðar áskoranir um að endurskoða ákvörðun
sína, var dauðarefsing yfir ríkisborgara Mexíkó framfylgt í Texas á dögunum.
Evrópusambandið og mannréttindasamtök um heim allan hafa
fordæmt atburðinn harðlega. Þá hefur ESB ítrekað skorað á Bandaríkin að endurskoða afstöðu sína til dauðarefsinga
almennt.
Það er skoðun ESB að dauðarefsingar séu
lítilsvirðing við mannlega reisn og
refsingaraðferð sem samræmist ekki mannréttindasjónarmiðum. Dauðarefsingar ber
því að afnema skilyrðislaust að mati ESB. Lesið
nánar hér.
 Liður í bættu umferðaröryggi:
Talandi bifreiðar
(5/8)
Framkvæmdastjórnin náði á
dögunum nýjum áfanga í áætlun sinni að
bæta umferðaröryggi þegar tekið var frá
pláss á svæði útvarpsbylgja fyrir tækni sem ESB hefur í
smíðum fyrir bifreiðar. ESB hefur um nokkurt skeið unnið að
því að koma á fót nýjum samskiptabúnaði í bílum sem
aukið gæti
umferðaröryggi til muna. Hinn nýji búnaður, sem
vonast er til að hægt sé að koma fyrir í öllum bílum innan
tíðar, byggist á þráðlausri tækni en
hann á að gera bifreiðum framtíðarinnar kleift að vara bílstjóra við óvæntum
uppákomum og hættulegum
aðstæðum. Vonast er til að þessi samskiptabúnaður komist í
gagnið innan fárra ára. Þessir svokölluðu talandi bílar eiga
meðal annars að geta varað ökumenn bifreiða við bleytu á
vegum, slysum sem orðið hafa og
umferðarteppum, og aukið þannig öryggi
ökumanna og vegfarenda.
Lesið nánar hér
 Aukið
eftirlit á fjármálamarkaði
(31/7)
Charlie McCreevy sem er í forsvari fyrir málefni innri
markaðarins í framkvæmdastjórn ESB, greindi á dögunum frá
undirbúningi sameiginlegra evrópskra reglna um aukið
eftirlit með matsfyrirtækjum á fjármálamarkaði. Fram kom í
máli McCreevy að mikilvægt væri að endurvekja traust í
garð matsfyrirtækja og koma í veg fyrir frekari
hagsmunaárekstra á fjármálamörkuðum. Að margra mati
brugðust matsfyrirtækin hlutverki sínu í að vara ekki við áhættunni af bandarískum
undirmálslánum. Vonast McCreevy meðal annars til að hinar nýju reglur eigi eftir að
leggja sitt á vogarskálarnar til að draga eitthvað úr óvissu
sem ríkir á fjarmálamörkuðunum. Þess má geta að almenningi
gefst kostur á að senda inn athugasemdir við tillögurnar
fram til 5. september n.k.
Lesið nánar hér.
 Grænt
ljós á að koma Roskilde Bank til bjargar
(31/7)
Framkvæmdastjórn ESB hefur lýst því yfir að aðgerðir
Seðlabanka Danmerkur til stuðnings Roskilde Bank brjóti ekki
reglur ESB um samkeppnishamlandi ríkisstyrki. Seðlabanki
Danmerkur ákvað fyrr í sumar að hlaupa undir bagga með Roskilde Bank, en
staðan á alþjóðlegum fjármálamörkuðum og lækkandi
fasteignaverð í Danmörku hefur leikið bankann grátt.
Lesið nánar hér.
|
